వెస్టిండీస్‌ విధ్వంసకర వీరుడు క్రిస్‌గేల్‌ మరోసారి దుమ్మురేపాడు. అబుదాబి వేదికగా జరుగుతున్న టీ10 లీగ్‌లో టీమ్‌ అబుదాబి తరఫున ఆడుతున్న గేల్షేక్ జాయెద్ క్రికెట్ స్టేడియంలో బుధవారం మరాఠా అరేబియన్స్‌తో జరిగిన మ్యాచ్ లో సంచలన ఇన్నింగ్స్ ఆడాడు. 22 బంతుల్లో 84 పరుగులు చేసి నాటౌట్‌గా నిలిచాడు.గేల్ ఏకంగా 9 సిక్సులు, ఆరు ఫోర్లు ఉన్నాయి.దీంతో మరాఠా అరేబియర్స్ నిర్దేశించిన 98 పరుగుల టార్గెట్ ను అబుదాబి 5.3 ఓవర్లలోనే ఛేదించింది.
కాగా..కేవలం 12 బంతుల్లోనే హాఫ్ సెంచరీ పూర్తి చేసుకున్న గేల్.. టీ10 చరిత్రలో ఫాస్టెస్ట్ హాఫ్ సెంచరీ చేసిన మహమ్మద్ షహజాద్ రికార్డును సమం చేశాడు. 2018 సీజన్లో షెహజాద్ రాజ్‌పుత్స్ తరఫున 12 బంతుల్లోనే ఆఫ్ సెంచరీ చేశాడు.ఇక ఈ మ్యాచ్‌లో తొలుత బ్యాటింగ్ చేసిన మరాఠా అరేబియర్స్.. 4 వికెట్ల నష్టానికి 97 పరుగులు చేసింది. గేల్ విజృంభనతో అబుదాబీ జట్టు 5.3 ఓవర్లలోనే లక్ష్యాన్ని చేధించింది. గేల్ చేసిన 84 పరుగుల్లో 78 పరుగులు బౌండరీల రూపంలోనే రావడం విశేషం.కాగా..యామిన్ అహ్మద్‌జాయ్ వేసిన తొలి ఓవర్లో వరుసగా మూడు ఫోర్లు, ఓ సిక్స్ బాదిన గేల్ 18 పరుగులు పిండుకున్నాడు. రెండో ఓవర్లో మరో ఓపెనర్ పాల్ స్టిర్లింగ్ తొలి రెండు బంతులను బౌండరీలుగా బాదాడు. అదే ఓవర్లో గేల్ వరుసగా మూడు సిక్సులు బాదడంతో.. 27 పరుగులొచ్చాయి. తర్వాతి ఓవర్లో గేల్ రెండు ఫోర్లు, రెండు సిక్సులు బాదాడు.
